نحب نحبّك بقلم :مريم العايب

img

نحب نحبّك

بقلم :مريم العايب

( نص باللهجة التونسية )

“هي”…طفلة في عمرها بالنسبة ليهم كبيرة،وانت كان تراها وتزيد تتعرف عليها تتاكد انها مازالت صغيرة،مازالت كيف تضحك تعمل برشا حس،بضحتكتها الدنيا تتهز وتتحط، زاهية،فدلاكة ،بليدة، تعمل برشا جو مع اصحابها وصحباتها،ساعات تلقاها نرفوزية،مغشاشة و ،بكلمة تنجم ترضيها،تخليها تفرح من عينيها ،الناس الكل يتربجو بيها،كل واحد منهم اش مسميها،الصغرونة،المزيانة،والا البنونة الحشامة..المتكبرة،الفنانة،الحالمة،الذواقة،تربيجات مفصلين علي قياسها ،لا هي كبيرة عليهم ولا هوما صغار علاها…تراها تجري،تطير،تجنح ،تفرح،تهبط لقشة من السماءلا حد منعها ولا حد حكم فاها..تسمع برشا غنايات تحسهم يحكيو علاها ومش علاها،مازالت تحب تلعب ،تمشي للماناج واشنيا الي فيها ،كان مشات تفرهدت ونسات الي نرفزها والي بكاها،تشري لحية جدي تكملها وماضبيها تزيد تاكل منها،ماهي ماتشبعش عليها…،تراها ،تكتب ديما عالحب .ياخي مش من حقها تحب؟، والا هوما حرموا الحب عليها؟..لوقتاش بش تبقي تكتب عليه ،تستني فيه ،بالك اليوم يتعدي،قداش بش تصبر،تستني، ،حايرة،تتمني،تحلم،بيه في اليقظةوفي منامها،بالك كيف تحل عينيها تتدعثر فيه ويتدعثر فيها..،تخاف كان يتعدي،يهرب عليها ،يخليها واقفة تتشكي وتتبكي..وحدها تمسح دميعاتها…علاش ماتخلطش عليه،تخطفو ،تهرب بيه .يكون ملكها واكيد بش ترضيه وبالوقت هو يرضي عليها…زعمة تخلط وهي المتكبرة ..المغرورة ..المتجبرة…الضايعة ..المهبولة.الي تحب تحس المطر كيف تصب،تتبل وكيف تروح تمرض وقتها تندم عالبلل،يكون معاها حبيبها يدفيها ويبعث فيها الامل ،تعنيقة تحت المطر خير من الدنيا ومافيها،تبقي عايشة بيها وعمرها ماتنساها…،تفرح كيف يتفكرها ،في عيد ميلادها،يكلمها اول واحد،يغنيلها غناية ،يتمني كان ربي ليه يخليها ،يهديلها وردة وكتاب،ماهو يعرف الي هاضوكم احسن كادوواتها..،يحسسها الي هي مهمة في حياتو,وكان لزم تكون الاهم،كيف تتخنق وتتسكر في وجها البيبان، ترجعلو،تحكيلو تفرغلو قلبها ،خاطرو السند الي تتكي عليه يواسيها،ينصحها،يحميها،يستحفظ بيها،يخليها ليه، حاجة منو وفيه ،بلاش بيه هي تضيع،اما تضيعو معاها ،في ثناياها و احلامها،تخليه مهبول مايحكي كان عليها،ومستحيل ينجم ينساها،وكيفاش ينساها وهي الي الي علمتو الي الحب مش الكلام الي يتقال اما هو الكلام الي عمرو ماتقال ومش باش يتقال،لهفتك كيف تراه،رعشتك كيف تسلم ،واش ينجم يصير فيك كان هو تكلم ،تخمامك فيه،تفقدو وتتوحشو ،تدخل بعضك كان بطي بش يسال والا يكلم يطمن عليك ،عينيك الي تفضحك ،تحاول تخبي تقاوم ،في الاخر تلقي روحك قدام الامر الواقع،افرح راك قاعد تحب..،لاهو حرام ولاهو عيب،الحب حاجة مقدسة ،عبادتنا احنا الاثنين،نكونو مسؤولين وواعين نتلهاو بيها باش نكونو للجنة ضامنين وفيها تلقانا عايشين في نعيم،ايجا علاش بطيت ،عندي برشا كلام يفرحك اما ينجم يبكيك..اسمعوا خمم فيه،احفضوا بالك نهار لغيري تهديه.اما توة هو هدية ليك ..نحب نحبك ومايهمنيش لا في الي انا عشتو ولا فلي انت عايش فيه،نجم نسيك الي فشلت فيه،ونكون معاك فالي بش تنجح فيه،ناقف معاك ،نسهر معاك الليل،كلو يهون معنديش منك اثنين،نحب نحبك ،ماتخممش فيها ،خوذها كيف ماهي ،من غير ما تسألني وين بش يهزنا الحب كان دخلنا فيه،ادخل وماتندمش مغمض عينيك،جرب تو تحصل،ماتحكمش عليه من بعيد لبعيد،نحب نحبك ،نحكي لصحابي عليك،نقلهم لقيت الي نساني تنهيدات سنين ومعاه نضحك بالقوي ومايهمنيش في حتي تعليق ،نحب نحبك ،نلصق فيك،روح وحدة،نكونو متحدين،كفار احنا والا مسلمين،المهم احنا لبعضنا عايشين،نحب نحبك ،نتخبي عندك،تحميني ونحميك،تحكيلي كل يوم حكاية وانا نحكيلك ديما حكايتين،نحب نحبك ومعايا نرجعك صغير ،تعيش حاجة اخري ،حاجة مزيانة يمكن عشت كيفها قبل اما مش بنفس التفاصيل،نحب نحبك،حل يديك خليني نجي عندك ،نرتاح ونرتحك لا نفد منك والا نجم نبعد عليك،نحب نحبك، نحملك،نتشعبط فيك نقعد هكاكة ساعة والا ساعتين ،نحب نحبك،كيف نراك نحفضلك ملامحك باش كان سافرت، خليتني وحدي ،يبقاو عندي نحارب بيهم وقت البعد والحنين،نجيك لدارك ،تقريني ونقريك ،نطيبو حاجة وفي كوجينتك نبوسك بوستين ،تسرح فيا ونسرح فيك،نطيشو الكتب،نعنقو بعضنا ونرقدو ،عاملين جو شايخين،نحب نحبك ونوعدك مانغشكش،خاطر كان غششتك ماتكلمنيش،وانا منجمش نصبر عليك،نحب نحبك ،تكون ليا الحب الاول والاخير،حاجة صحيحة ساسها قوي مش كيف الي كنا فيه عايشين،نحب نحبك ونعرف الي انت في كلامي سارع ،هزك لبعيد ،تتخيل،تحلم و ،مؤثر فيك…نحب نحبك ،ومالازمنيش نزيد،اصلا شنيا باش نزيد،ضاع الكلام وضعت انا فيك….

Facebook Comments

الكاتب جمال قصودة

جمال قصودة

شاعر تونسي ، أصدر كتاب " الغربة و الحنين للوطن في شعر سعدي يوسف " دار القلم ،تونس 2015، مدير الموقع و رئيس جمعيّة أنتلجنسيا للتنمية الثقافية و الاعلام ( مقرّها ميدون جربة ،تونس )

مواضيع متعلقة

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: