نحبك برشا – مريم العايب 

img
نحبك برشا – مريم العايب 
( النصّ باللهجة التونسية) 
نحبك قد المحبة..قد الهبال..قد الوحش وقد الغيرة
نحبك ..هالكلمة الي ماحسيتها كان ليك..تقالت اول ماتقابلوا العينين.. ماغير ماحكاوا..رمشة العين مع العين وخرجت هالكلمة..نحبك.مش وحدها..اما.. نحبك برشا..
نحبك..وحياتي منراها كان معاك وبيك هي تزهي وانا نتمناها تزيد..تحلا بالشوية بالشوية ولواش الزربة..هنا مابعضنا …انا ليك وانت ليا..انت حكاية غرام..تفرهيدة..تنفيسة تخرج مالاعماق..تنسي الي تعدي..و تبني علي قدام..انت…لحن..نغمة..موزيكا بنينة..قداش شخنا عليها..هربتي الأولى والاخرى.طريق طويل..مسافة اتعب..بحر كبير..الموج العالي…النسمة الخفيفة…الشمس الي غابت..الدنيا الي ضلامت..النجوم الي بانت..القلب كيف دق..لا حسب ولا خمم..حس بحاجة قوية..حس بالحب..الحب الي يتعب..صعيب اما يفرهد..أولو جنة..واخرو نار…تمسك بيه..احميه ومالعينين خبيه«سترة المحبة لازمة»..هالسترة الي مرة حكيتلي عليها وانا كيف البوهالية ضحكت عليها..توة رجعت بالوقت لتالي ..لنفس اللحظة..هاني نادمة..تمنيت كان زدت حكيتلي عليها..مداهما لازمة..يقولو الي العين تقتل الحب..الي العين ماتخلي حد مرتاح..اما لا ..الي يحب بالحق لا يؤثر فيه لا قضاء ولا قدر..لا عين ولا كلامات الناس..الي يحب عمرو مايغلط..عمرو ما يجرح…الي يحب يقدر..يعمل حساب للي معاه في حضورو وحتي في غيابو..الي يحب يقاوم..يثور..يقلب الدنيا ويقعدها علي خاطر الي يحبو..وانت حبيتني؟؟انت الي كنت تقلي لا نبدلك لا بالشمس ولا بالقمرة..مش كنت في عينيك انا الشمس والقمرة زادة..وينو هالكلام..الي بيه دنيتي فرشتهالي جنة…وأنا..الي ماعرفت الحب كان عندك..بين ايديك ..حسيت…حلمت..بنيت وعليت..تخيلت معاك..دار ..وصغار..برشا جوجمة..حس..وهرج..اما مااحلاه هرج..تخيلتنا..ديما مبعضنا..اليد في اليد..حلمت معاك بحب كبير يهزنا احنا الاثنين…حب مايعرف مالاسامي كان اسامينا..مايعرف مالنبض كان نبضنا.حب مايرانا كان جميع….ايجا..ومن هالحلمة ماتفيقنيش..سنين وانا نتمني فيك…ايجا..حبني..تو تلقي فيا الي تلوج فيه..ايجا نبداو نعيشو ..في غيابك كنت تاعبة وماكنتش نعيش..ايجا ..عنقني..اجبدني ليك..خبيني بين ايديك..قلي كلام ..قويني بيه..ايجا حبني ..محبة كبيرة..تنسيني الوجيعة..ايجا خلينا نفرحو..احنا الي مايواتينا كان الفرح… ايجاني..هاني نستني فيك.. ايجا حبني وحببني فيك..خليني مانراك كان انت وماتراني كان أنا..ايجا..اسرح فيا وخليني نسرح فيك ..هكا حلمت بينا..ومازلت نحلم..خليني مؤمنة بيك….حبك الكبير..قد الدنيا ومافيها..حب يخلينا لبعضنا…يخلينا اليد في اليد.. ايجاني وماتخلينيش..عييت وانا نلوج فيك..ايجا..خليني بيك نحيا و فيك نعيش…
Facebook Comments

الكاتب admin

admin

مواضيع متعلقة

اترك رداً

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.