روعة العبيدي :مازلت نحب نعيش

img
شعر 0 جمال قصودة

روعة العبيدي :مازلت نحب نعيش
_______

كلام لمراية صحيح ..
شعري بدا يطيح ..
ممكن خاطرني نغسل فيه في المغرب ..
و يڨولو موش مليح ..
كلامها صحيح ..
بدني بدا يتسل ..
أما هاني نرا فيه مكبّش ..
مازال شاد صحيح ..
كلامها صحيح ..
وجهي بدا يذبل ..
شعر حاجبي عمّال يطيح ..
ممكن خاطرني نكره الشّمس ..
و ما نخرج كان في الرّيح ..
كلامها صحيح ..
عينيا مدمعة .. طفات اللّمعة ..
و الاكحل فيهم بالح قبيح ..
ممكن خاطرني رڨدت على جمبي ليسار لبارح ..
و حلمت ب ماما تبكي و تصيح ..
كلامها صحيح ..
شفراتي كل يوم تنقص منهم وحدة ..
تضيع ..
ممكن خاطر مانيش لاهية بيهم ..
و الا هذاكا هو عددهم ..
اما انا مكنتش حاسبتهم بالصحيح ..
كلامها صحيح ..
وجهي اصفر ..
ممكن خاطر نكره اللحم و مانكلش الدجاج و نعيف الحوت ..
سي نورمال دمّي باش يطيح ..
كلامها صحيح ..
العروڨ في يدي باينة ..
و ڨلبي يضرب بلقوي ..
أما لبنات لكل هكاكا..
غير انا منثبّتش مليح ..
كلامها صحيح ..
ظهري مقيّح ..
ممكن خاطرني نعيف كل جرح في البدن..
و نخاف كل تخربيشة عاللّحم ..
هاني نداوي فيه ..
تو يبرا بعد ميشيح ..

كلام لمراية لكلو صحيح …

أما انا مازلت صغيرة .. توّا وين عرفت الحب و تبنّنت الغيرة .. أنا وردة .. ليوم تفتحت و كبرو فيها الحلمات .. ليوم وين عرفت فنتازيا و سيدة الكلمات .. ليوم وين قابلت Raouaa و Shayma و Ahmed و عملت خوات .. ليوم وين نطقت و كتبت و ولاو عندي برشا تنفيسات [ 11 , 2 , 3 , 4 , 5 , 6 , 7 , 8 ] .. ليوم وين حلّيت عيني عالمحبة و حلّيت ڨلبي للاصحاب و عملت صحبة مع الكتاب و تعلّمت اللّي النجاح عندو أسباب ..

كلام لمراية لكلو صحيح ..

أما انا لبارح في ليام جيت .. وصلت للعشرين و عمري مجريت .. خاطرني خوّافة .. نخاف نطيح .. نخاف ندّعثر .. نخاف نتجرح .. نخاف نتكسر .. حتى و انا نزرب بش نخلط عالترينو منجريش .. نقول خلّيه يفوت .. نخاف نموت ..

كلام لمراية لكلو صحيح ..

الدنيا قصيرة و فيها ماناش مخلدين .. اما انا مازلت بيبي عمرو شهرين .. مازالو كي كملو اطرافي كيفاش بش ترجعو فوڨي تراب رزين .. و كيفاش بش تخليولني نكتب في الظلام و نقرا لروحي بصوت حزين .. حبيت نقرا بيناتكم كيما توا نخزر في عينيكم و كي نكمل تصفقولي خاطركم بيا فرحانين ..

كلام لمراية لكلو صحيح ..

اما انا مازلت نحب نكتب و نڨول حروف .. مازلت نحب نطلع عالرّكح و تعطيني الدنية كفوف .. باهي كيفاش يش نرڨد أنا منغير فرشي .. وين بش نحط ساقي و وين بش نحط كرشي .. و كي نحب نحط ساڨ على ساڨ ؟ .. باهي و حوايجي وين بش نلڨالهم طاق .. و المستطيل عمّال بيا يضياق ..

كلام لمراية لكلو صحيح ..

أما انا مازلت نحب نلعب مع خويا .. و نرسم بالالوان امي و بويا .. و نصنع ل Mehdi شال صوف .. و نعلّم Thabet ينحي الخوف و نڨول لŅįďhąłراني نحب أمي .. و نهدي ل Imed عمري .. و هبة نعنقها .. و نڨول ل ياسر صوتك ڨمري .. و لبابا متغيبش يا نجمة عمري .. و مازلت نحب نسمع من دارنا وين ماشية و وين كنتي .. و نظفر بيديا شعر بنتي ..

كلام لمراية لكلو صحيح ..

أما انا مازلت نحب نمشي لشارنيكول و نعمل حفلة للصغار .. مازلت نحب نزرع الورد و نعمل بيبنيار .. مازلت نحب نعبي مكتبتي و نسافر كل يوم .. مازلت نحب نسهر في الصيف و نحكي مع النجوم .. مازلت نحب نصنع دار باللوح و نعبيها بالفن .. نحبها خارج لمدينة بعيد عاللي يبيعو الكفن ..

كلام لمراية لكلو صحيح ..

أما انا مازلت نحب نصوّر .. مازلت نحب نشوف وجهي منوّر .. مازلت نحب نبكي و مرايتي تڨلي ” متبكيش “.. ” مازال في عمرك برشا ” .. ” متخافيش “..

مازلت نحب نعيش ..
_______

روعة العبيدي،2017©

Facebook Comments

الكاتب جمال قصودة

جمال قصودة

شاعر تونسي ، أصدر كتاب " الغربة و الحنين للوطن في شعر سعدي يوسف " دار القلم ،تونس 2015، مدير الموقع و رئيس جمعيّة أنتلجنسيا للتنمية الثقافية و الاعلام ( مقرّها ميدون جربة ،تونس )

مواضيع متعلقة

اترك رد

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

%d مدونون معجبون بهذه: