الكتيبة تربطني بيك-مريم العايب 

img

الكتيبة تربطني بيك-مريم العايب 

( النص باللّهجة التونسيّة)

نحب نكتبلك حاجة،كلامي يخون فيا مش عارفتو يحبني نحكي عليك والا نحكيلك عليا،نحكيلك علي حنيتك،كلامك ودلالك،والا علي محبتي ،تخمامي وغيرتي عليك..نحب نكتبلك،نفرغلك قلبي،قلبي الصغير ،الي ياما خبا حكايات،حكاياتك الي خبيتها عليه،وخيرت سكاتك،تخاف تتكلم،تصارحو ،توجعو وييعد عليك،سكاتك مفضوح،كيف عينيك،الي تخونك اول ماتقابل عينيه،لغة العينين،ياسر صادقة،توصل خير مالكلام ومن التعبير..نحب نكتبلك،نفرحك ،نطيرك،نخطفك ،ونهرب بيك،نخليك سارح ومع كلامي مسافر ميهمش وين يهزك المهم كبش فيه،وهو عمروا مايخليها بيك،نحب نكتبلك،نصورك ونتصورك،نصورك في تصويرة مزيانة،تصويرتنا احنا الاثنين،انا وانت وحدنا ،تخاف عليا ونخاف عليك ،تغير وانا في غيرتك نفني ونرجع نحيا ونعيش،نحب نكتبلك،ونقلك كلام يواتيك،مفصل علي قياسك،يكون نسخة منك،يكونك ،انت، يعيشك بيه،معاه وليه..نحب نكتبلك،نحكيلك عالفرحة،المحبةالغزرة،والكلمة،علي زينك،دلالك وعينك،وجهك،يديك،تعنيقتك،بوستك،وريحتك،نلمهم منك ونخرجهم في احساس نوصلوا مني ليك.،احساس بسيط يخبي معاني كبيرة،وانت الكبير،نعرفك تفهموا،وهاك مؤمن بيه،نحب نكتبلك،وعمري ماكذبت والا خبيت حاجة عليك،كنت صادقة في الحب الي نحبو ليك،حب صافي،كيف السماء،مزيان كيف القمرة،كيف النجمة والوردة،كبير كيف البحر،عالي كيف الجبل،بنين كيف الشكلاطة وحلو كيف الكريمة..نحب نكتبلك،الكتيبة حاجة مالحاجات الي تربطني بيك،مهما يصير ماتبعدنيش عليك،كتيبتي،اليوم هدية ليك ،بالك تستحقها وغدوة لغيري تهداها،اما مش باش يكون صادق كيف الي نحس فيه خاطر الاحساس الصادق للكتيبة يوصل مرة ومش مرتين…نحب نكتبلك،نطق علي خاطرك الحروف الجامدين،يتفاعلوا معاك وقت الي تكون فرحان والا حتي حزين،نحب نكتبلك برشا كلام،ومش منجمة،تلقاني،ساعات ،خايفة،مترددة،وساعات مسيبة روحي ليك،نحب نكتبلك،نحميك،نخليك تهتري بيا في الصباح وفي الليل،نكون كيف الحلمة الي مهما عملت فيك،ماتحبش تفيق منها،نحب نكتبلك،كلام يفكرك بيا،ويفكرني بيك ، حاجة قوية،تو تفهمها وقت الي تبدلني و نبعد انا عليك..

Facebook Comments

الكاتب admin

admin

مواضيع متعلقة

اترك رداً

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.