اشطح للڨرد في دولته_مريم البريبري 

img
Share Button
اشطح للڨرد في دولته_مريم البريبري 
( النص باللهجة التونسيّة)
عم علي الغيبة طويلة و الزنبيل تعبى وما لڨاش لمن يفرغ ..
ليام دالة بدالة و ما عاد تلڨى فيها سوالة ..
ولا عاد تلڨى الحبيب الصافي ولا الميزان الوافي .
عمي البر خلى من اطيابه .. وعمراته كلاب العسة ..
عاد أنتم كليتوها غصة .. و سيبتوها تنهش بالڨُصَّة
برنا يا عم كثر فيه الكلوف
و فساد الكيوف ..
الكلام والڨول والتعاويد والتكمبين و التشوحير والتڨوحير والتڨوعير .
أنتم بنيتي ناس تموتو عالحس و والهدرة و أخبار الناس ..
وعايشين بلا حكمة في الراس ..
واش لازكم على اللهوة و الأوجاع ؟؟
ناسنا ڨالو : إلي تراه راكب فركة **** ڨوله مبروك الحصان
واش يعنيك على الخلايڨ كربه *** إذا رڨدت هوما سهروا
واللي هازز فوق ظهره ڨربه **** حتى تڨطر تڨطر على ظهروا .
عم علي زماننا خذا من زمانكم ورثة ..
زادوا فينا الرهدانة والقوادة والبيوعة و العساسة و الصبابة واللحاسة والحوافة و-الڨحافة..
كيف تتكلم لازم تتلفت لأجنابك .. وتحكي في جيبك وتحسب كلماتك ..
كيف تشوف الحاكم لازمك تتخبى ولا تسكتن وتنافق وتترهدن ..
لازمك تسمع الكلام وتبلع و ما تسألش وما تحكيش و ما يهمكش و إلي يتقرر يتنفذ ..
لازمك ترخص و تعطي للذل كارو وطاطي راسك و ڨول يحي هضاكا.
اسمعي هالكلمات وافهمي الأبيات وڨولي يرحم إلي مات :
على وڨتنا كيف كثرت القوادة كنا نڨولوا :
الحس ياسر ما يفيد بشي **** إسمع كلامي كان كنت لْبيب
ما يفيد آخر طُب كان الكَيْ **** أسأل مجرب ڨبل طبيب
هاذي الدنيا عڨابها للفَيْ **** وآخر ردًّه كل بْنَي خْريب
لا تدوم رعية ولا يدومش بَيْ **** الدايم ربي المعتلم بالغيب
في ڨاع الڨدره ما تبقى شَيْ **** الجيل هذا جملتو مجاديب
غلات العيشة وما يقاسي الحي **** الثوم المنتن أفوح من الطِّيبْ
سي الفكرون عمل ڨابَدَيْ **** رفيڨه بوكشاش والتَبيب
وبودرنًّه اليوم مارالَيْ **** يحكم في ستين ألف سبيب
عميمك جبت الكلام ذْكَيْ **** كل معنى ليلها الترتيب
أشطح للڨرد في دولته *** وڨوله أنت خيار كل حبيب ..
__
من ناحية دولة قرودة هي دولة قرودة …
الله يرحم إلي مات
_______
ڨابدي :رتبة عسكرية تركية تطلق على الرئيس المتصلب
مارالي : أمير لواء
Facebook Comments
Share Button

الكاتب admin

admin

مواضيع متعلقة

اترك رداً